محتاجة رايكم اعمل اية

انا محتجاكم تشركونى فى الموضوع ده
انا عندى بنت فى 6 ابتدائى والبنت دى بتحب السرقة ودة مش لانها محتاجة بل بالعكس هى غنية
جدا واهلها بيدولها كل حاجة هى عوزاها ممكن تسرق حاجات بسيطة وممكن تسرق حاجات غالية
حاولت افتح الموضوع فى الفصل لكن بدون اى فائدة
انا بفكر ان دة ممكن يكون لشد انظار الناس ليها وعشان تلاقى منهم اهتمام
ساعدونى اعمل اية
صلوا من اجلىها ومن اجلى انا ايضا

موضوعك دة انا فاهمه و حاسه كويس اوى لأن فى خادمة زميلتى كان عندها بنت بنفس الطريقة بالظبط بالظبط
و حسب رأيى اللى واخده من دراستى للتربية و علم النفس و سيكلوجية الطفل
البنت دى تستخدمى معاها الخطوات التالية بالترتيب:-
1-العقاب
مش معنى كدة تضربيها بطريقة وحشية كل شوية
لكن احرميها من الهدية لو سرقت و اعملى نفسك زعلانة منها جامد و فوق كدة و كدة يا ريت تضربيها بس مش جامد عشان متتعقدش و يا ريت يبقى عقاب متقطع
2- الاعتراف
يا ريت توديها لأى اب كاهن عشان تبدأ تعترف و تفهمى الاب الكاهن مشكلتها و تعرفيها تقوله اية و هى بتعترف
3- تكلميها انتى نفسك كتير فى الموضوع دة من جوانب كتيرة و تساعديها تكتسب احترام لنفسها و تبطل اللى بتعمله دة ( و كأنك المرشدة الروحية بتاعتها)
4- التعزيز المستمر
يا ريت لما متسرقش حاجة او متعملش مشكلة بسبب الموضوع دة تعززيها بأستمرار و لو حتى بمكالمة تليفون يعنى تتابعيها 3 مرات فى الاسبوع مثلا تتصلى تفتقديها و تطمنى عليها
و لو لقيتى فى تحسن اديها هدية بسيطة

ملحوووووووووووووظة مهمة
اعملى الحاجات دى و انتى مصاحباها و كأنك صاحبتها عشان متتكسفش منك
و يا ريت يا ريت يا ريت البنت تبقى عارفة هى بتتعاقب لية و تبقى عارفة هى بتتكافئ لية

و يا رب تنجحى فى اصلاحها و حاولى بالخطوات دى مش هتخسرى حاجة و لو فى حاجة مش فاهماها او عايزانى اوضحهالك قولى و انا اوضح اللى انتى عايزاه
ربنا معاكى

صح يا مينا انا متفق معاك بس اضيف اهم حاجه الصـــــــــــلاه من اجل البنت دى
وممكن اضيف كام نقطه تانيه
1. لازم تخدمى البنت خدمه فرديه يعنى تصاحبيها وتحاولى تعرفى هى بتعمل كده ليه علشان تعرفى تحلى المشكله .
2. زيارة منزل الاسره بتاعت البنت دى علشان ممكن يبقى السبب فى البيت نفسه .
3. ضرورة معرفة الاهل بهذا الموضوع لكى يستطيعوا التصرف ولكن بدون عقاب جامد لهذه الفتاه .
4. يستحسن عدم العقاب الا اذا اضطرت الظروف لذلك حيث ان هذه الطفله هى اولا واخرا كيان بشرى وانتى عملك خادمه فهل يصح لخادمه ان تضرب وتعاقب سيدتها .
5. ممكن العقاب زى مابيقول علم النفس يبقى بكذا طريقه فالحرمان من الهدايا يعتبر عقاب , عدم سماع كلام المديح يعتبر عقاب .
6. لازم يكون فيه تعزيز للسلوك يعنى لو عملت سلوك صح لازم تعززيها .
7. لابد اولا واخرا من الصلاه الى الله اللى يقدر يخليكى تقفى على ابعاد المشكله وتحليها .
8. ابحثى فى النت عن مشاكل الاطفال وازاى تتحل واستخدمى علم النفس فى حل المشكله .
وان شاء الله هحطلك موضوع عن المشكله دى فى قسم الطفوله .

ده كل اللى قدرت اميزه من كلام الله ليا بخصوص الموضوع ده بس لازم الصلاه . وانا برضه معنديش خبره جامده فى المواضيع دى . يا ريت تشركى امين الخدمه واب اعترافك فى حل المشكله دى.

ميرسى لاراكم انا فعلا بحاول اخدمها خدمة فردية
بس فى حاجة البنت متعرفش انى اعر وانا خايفة اعرفها تكرهنى
انا اتكلمت مع اب اعترافى واب اعترافها اولا واخيرا طلبوا منى تقريبا نفس الكلام الى قولتوة
وايضا الصلاة صلوا معى من اجل هذا الموضوع

كلامك سليم مية المية يا جرجس و طبعا الصلاة اهم حاجة فى الخطوات دى كلها و اضمن خطوة ممكن الخادم يقوم بيها عشان مخدومية

اما بالنسبة لسانت مارى جيرل
احب اقولك انك لازم تعرفيها انك تعرفى و هى دى اول خطوة لمصادقتها
و دة طبعا مش باسلوب فظ و تقوليلها انا عارفة يا بت انك حرامية و كذا و كذا
لالالالالالالا الصح انك تدخلى معاها مدخل هزار و انتى مبتسمة ابتسامة خجل من التصرف دة و حسسيها بخجل بسيط من اللى بتعمله باسلوبك الرقيق معاها
ربنا معاكى

نسيت اقولك خليها تصلى هى نفسها باسلوب اوتوماتيكى و بصورة ذاتية و تطلب من ربنا انه يخليها تبطل اى حاجة وحشة و كدة يعنى

انت استاذ سيكولوجى يا مينا كلامك حكم

يا جماعة النوع دة من السرقة مش لسبب
الحاجة بيكون مرض ولابد من العلاج
واهم حاجة الصلاة...عشان ربنا يشفية
من المرض دة

ميرسى لردودكم واهتمامكم