حبايبنا شباب اليومين دول

حبايبنا شباب اليومين دول اسم الصليب عليهم الثقافة مقطعة بعضها .. قاعدين 24 ساعة في اليوم قدام الانترنت.
شباب اليومين دول يومه متشقلب . نهارة ليل وليله نهار .. وطبعا فين وفين لما يشوف اسرته او يقعد معاهم يتغدوا سوا ..

حبايبنا شباب اليومين دول لما تقوله يا ابني بلاش قعدة على النت كتير يقولك اما اعمل ابحاثي ازاي ( آل ابحاث آل ) ولما ابوه او امه ( ابوها او امها ) تقوله قوم زاكر تبقى القيامة قامت وتحول إلى وحش كاسر . ولو لا سمح الله لا سمح الله يعني والدته قالتلو قوم يا ابني اقرأ في الانجيل تلاقيه بيرد عليها بطرف مناخيره وبكل ألاطة ( من فضلك يا ماما .. المسائل دي تخصني وهي بيني وبين ربنا .. ولو سمحتي محدش يدخل بينا ) .. شوف الواد بيقول لأمه إيه .. قال بينه وبين ربنا قال ..

حدث ولا حرج عن اوقات الفراغ ولما الشيطان يلعب بدماغ الواحد تلاقيه بيفتح مواقع ملهاش لزمة أو يدور على حد جديد يتعرف عليه في دردشة برده مالهاش لزمة .. وصفحة تجر صفحة وغرفة تجر غرفة .. ويوم يجر يوم ..

والشاب من دول يلاقي بعد شوية العمر بيجري واصحابه بقوا حاجة وانا لسة قاعد قدام النت

حبايبنا شباب اليومين دول بينسوا ان النت سلاح ذو حدين واحد مفيد ونافع والتاني فيه سم وسمه قاتل.
حبايبنا شباب اليومين دول بيقضي وقت قدام النت اكتر ما بيقضيه مع عيلته ولا مع ربنا . فاكر ان العلاقة مع ربنا ان كل كام يوم يفتح موقع ديني وخلاص
حبايبنا شباب اليومين دول بقى سطحي وساذج مايعرفش حاجة عن نفسه ولا بيحاول يعرف ومايعرفش حاجة عن ربنا ومش بيحاول يعرف وفاكر انه كده هايبقى شاب كووول ولا بنت روشة

ياريت يا شباب نفتكر الاية اللي بتقول : ايها الاخوة الوقت منذ الان مقصر 1كو 7: 29
يعني ممكن المسيح يأتي في اي لحظة يسأني انت عملت ايه بالوقت اللي انا ادتهولك

وكمان الاية اللي بتقول
لست اسال ان تاخذهم من العالم بل ان تحفظهم من الشرير يو 17:15
يعني احنا عايشين في العالم لكن العالم مش ممكن يعيش فينا وبنستفاد من الاشياء زي الانترنت بدون ما يأثر بشره علينا

حبيايبنا شباب اليومين دول .. اسم الصليب عليهم ما يفارقوش الكنيسة ابدا لا صبح ولا ليل . ولما الواد من دول ابوه يسأله انت رايح فين يقوله: الكنيسة يا بابا

ولا انتي جاية منين يا بنتي تقوله : من الكنيسة طبعا يا بابا .. ما انت عارف.

آه بابا عارف ان ولاده اسم الصليب عليهم ما يفوتوش اجتماع لكن آه آه لو يعرف انهم بيحضروا الاجتماع في الحوش ..

حبيايبنا شباب اليومين دول يبقى الاجتماع شغال جوة وهم واقفين بره زي ما يكون الدخول بفلوس.

حبيايبنا شباب اليومين دول نزلوا من بيوتهم واستقطعوا من وقتهم الثمين " الله يكون في عونهم " استقطعوا وقت ينزلوا فيه الكنيسة وبذلوا مجهود في اختيار انسب لبس وحتط انسب ( ميك اب ) ودفعوا اجرة تاكسي رايح وتاكسي جاي .. ولما دخلوا الكنيسة مش هاين عليهم يدخلوا يسلموا على صاحب البيت وكأن رجليهم مش جايباهم يخشوا جوة .

حبيايبنا شباب اليومين دول لما يتعزموا في عيد ميلاد حد من اصحابهم بيتشيكوا ويتسابقوا انهم يأخذوا احسن هدية معاهم وهم رايحيين ويتسابقوا انهم يوصلوا بدري علشان يهنوا صاحبهم بعيد ميلاده ولما يوصلوا يقعدوا جنبه وهم يقدمولوا اجمل عبارات التهاني وهو يقدملهم حفلة جميلة وعشاء يليق بيهم ..

لكن لما الرب يسوع نفسه بيعزمهم في بيته كل اسبوع في حفلة اسمهة ( القداس ) مش بيهتموا انهم يحضروا بدري ولو جائوا بيبقوا باين عليهم النوم والنعاس غالبهم
ولما يقولهم اتفضلوا خشوا الحفلة جوة الكنيسة مش في الحوش يتلكعوا في الدخول .

والادهى من كده ان فيه ناس بتيجي على الاكل علطول ( التناول ) بدون ان يهتموا بصاحب العزومة ولا يعيروه اهتمام ولا يهتموا بمشاعره الرقيقة التي نجرحها كثيرا ..

حبيايبنا شباب اليومين دول فرحان انه بيروح الكنيسة واللي يسأله انت ما جتش ليه يقوله لأ انا جيت .. وهو للأسف جاء وكأنه ما جاش

حبيايبنا شباب اليومين دول لو حسبها هايقول كلمة ابرك من عشرة وساعة ابرك من اسبوع يعني يروح الكنيسة وهو عارف هدفه ومحدده بدون ان يضيع وقت ويروح بعدها علطول منغير ما يضيع وقته

ولو حسبها صح هايقول : آجي الكنيسة ساعة لكن استفيد احسن ما اقعد اليوم كله في حوش الكنيسة بدون اي فايدة .

وحدث ولا حرج عن خدام كنيستنا الحلوين اللي هم المفروض يكونوا قدوة تلاقيهم برده بره الاجتماع وبره القداس .

آه يا رب
آه لو نعرف ان اللي بيجي الكنيسة دقيقة واحدة ويسمع فيها صوتك وتعمل بروحك في قلبه هايكون مقبول أكتر من واحد تاني قاعد ليل ونهار في بيتك لكن عمره ما قعد مع صاحب البيبت
آه يا رب لو نعرف ان احنا بنخدم بيتك كتير وبنشغل نفسنا بهموم بيتك وكنيستك ولكن عمرنا ما خدمنا رب البيت ولا شغلنا نفسنا بيك

آه يا رب لو نعرف ان دينونتنا هاتكون اكتر واعظم من دينونة اللي ما جاش خالص

لأن هو ما جاش اصلا ايا كان السبب لكن احنا جينا لغاية عندك ومدخلناش

حبيايبنا شباب اليومين دول لو حسبوها صح هايلاقوا الفرق عدة امتار ما بين الداخل والخارج ..لكن في الحقيقة انها عدة اميال ما بينهم وما بين من هم بالداخل يسمعون كلام الله ويكلمونه

(لان مجد الرب ملا بيت الرب 1مل 8: 11)
لاحظ انه لم يقل حوش بيت الرب

الكلام دة طبعا مش بتاعى بس دة وراهونى امين خدمة المكتبة عندنا فى الكنيسة لما احتدم الجدل بينا لأنه شافنى مربى دقنى شوية فدخلنى جوة وورانى الموضوع دة على الجهاز بتاعة و هاتك يا تأنيب فى زى ما اكون انا المسئول عن ضياع الشباب حول العالم

رأيكم اية؟

قاعدين 24 ساعة في اليوم قدام الانترنت.فعلا

الموضوع يا مينا جميل جدا جدا

ربنا يباركك

بس انت من شباب اليومين دول ولا لا بصراحة

حبايبنا شباب اليومين دول 69846657ci8

لية الاحراج دة يا عم بيتر
فى حاجات و حاجات بصراحة
و انت؟؟؟؟؟؟؟؟؟؟؟؟؟؟؟؟؟؟؟

ياد محسسنى ان عندك تسعة و تسعين قرن
امال انت من شباب اليومين اللى فاته
ارحم نفسك
و شكرا ياعم على النصايح

بلاش الكلام بالاسلوب دة ايها العضو ماركو
انا حساس اصلى و انت بتجرح فى العضو اللى قدامك
انا بكيت فعلا و انا بقرا كلامك

.. قاعدين 24 ساعة في اليوم قدام الانترنت.
لية الولد بيعد على النت 24 ساعة حرام افرض انه له اخوات وعايزين يعودوا ده بجد يكون ولد سورى يعنى

ههههههههههههههه
هو فعلا هيكون ولد سورى
بس افرضى انه مبرمج و افرضى كمان ان اخواته عندهم their own laptops